काठमाडौं–सम्माननीय प्रधानमन्त्रीको राजनीतिक यात्रासँगै अहिले एउटा नाम फेरि चर्चामा आएको छ–गुरु केदार बराल।

प्रधानमन्त्री बन्नुअघि नै वरिष्ठ पत्रकार बबिता बस्नेतले ‘समयभित्रको समय’को प्रसंगमा उहाँ भविष्यमा प्रधानमन्त्री बन्ने भविष्यवाणी गरेको चर्चा हुँदै आएको छ। तत्कालीन राजनीतिक परिस्थितिमा केपी शर्मा ओलीका लागि कठिन समय आउने संकेतसमेत उनले गरेको बताइन्छ। बबिता बस्नेतले सार्वजनिक रूपमा व्यक्त गरेका ती भविष्यवाणीहरू प्रधानमन्त्री बनेपछि फेरि चर्चामा आएका छन्।

तर प्रधानमन्त्री बनेपछि उहाँको आगामी राजनीतिक यात्राबारे गुरु केदार बरालको ज्योतिषीय विश्लेषण पनि अहिले विशेष चासोको विषय बनेको छ।

गुरु बरालका अनुसार प्रधानमन्त्रीको कुण्डलीमा आगामी वर्षहरूमा शक्तिशाली राजनीतिक योग देखिन्छ। उनको विश्लेषणमा करिब पाँच वर्षसम्म प्रधानमन्त्रीलाई राजनीतिक रूपमा सहजै हल्लाउन कठिन हुने, त्यसपछि राष्ट्रिय स्वतन्त्र पार्टीको नेतृत्वमा पुग्ने र त्यसपछिको लामो अवधिमा प्रधानमन्त्रीका रूपमा देशको नेतृत्व गर्ने सम्भावना देखिन्छ।

गुरु बराल आफूलाई प्रधानमन्त्रीका कट्टर समर्थकका रूपमा खुलेर प्रस्तुत गर्छन्। तर उनको भूमिका केवल समर्थनमा सीमित नरहेको उनको दाबी छ। प्रधानमन्त्रीका विषयमा आफूले गरेको ज्योतिषीय विश्लेषणअनुसार उहाँले कतिपय अवस्थामा आफ्नो राजनीतिक बाटो अघि बढाएको बराल बताउँछन्।

विशेषगरी, प्रधानमन्त्रीले अन्तर्राष्ट्रिय मञ्चमा देशको प्रतिनिधित्व गर्ने विषयमा विभिन्न तर्क र बहस भइरहेका बेला पनि “प्रधानमन्त्री जानुपर्छ” भनेर आफूले निरन्तर धारणा राखेको बरालको भनाइ छ। पछि प्रधानमन्त्रीले त्यही दिशामा कदम चालेपछि आफ्नो ज्योतिषीय विश्लेषण र परिस्थितिको मूल्यांकनप्रति उनको विश्वास अझ बलियो बनेको देखिन्छ।

गुरु केदार बराल परम्परागत झाँक्री विद्याको अभ्यास तथा ज्योतिषशास्त्रको अध्ययनसँग जोडिएका व्यक्ति हुन्। सामाजिक सेवामा समेत सक्रिय रहेका बरालले विभिन्न सामाजिक तथा मानवीय गतिविधिमा काम गर्दै आएको बताइन्छ। उनी चिना हेरेबापत शुल्क नलिने र झाँक्री विद्यामा अध्ययन गर्नेहरूलाई आफ्नो ज्ञान तथा अनुभवबाट मार्गदर्शन गर्ने गरेको बताउँछन्।

उनको दाबीअनुसार नेपालका विभिन्न राजनीतिक नेतृत्व, प्रधानमन्त्री, राष्ट्रपति तथा राजपरिवारसँग भेटघाट र काम गर्ने अवसर उनले पाएका छन्। विभिन्न देशको भ्रमण गर्दै धार्मिक, आध्यात्मिक तथा सांस्कृतिक पक्षको अध्ययनसमेत गरेको उनको भनाइ छ।

प्रधानमन्त्रीको सन्दर्भमा गुरु बरालको पछिल्लो फलादेश अझ रोचक छ। उनका अनुसार प्रधानमन्त्रीको राजनीतिक यात्रा अहिलेको अवस्थामै सीमित छैन; आगामी वर्षहरूमा उहाँको राजनीतिक प्रभाव अझ विस्तार हुने योग कुण्डलीमा देखिन्छ।

अब यो फलादेश कति मिल्छ भन्ने कुरा आगामी वर्षहरूले देखाउनेछन्। ज्योतिषीय भविष्यवाणीको अन्तिम परीक्षण भने समय र वास्तविक राजनीतिक घटनाक्रमबाटै हुनेछ।

तर सम्माननीय प्रधानमन्त्रीको राजनीतिक यात्रासँगै गुरु केदार बरालको ज्योतिषीय विश्लेषण र उहाँको मार्गदर्शन अहिले चर्चाको अर्को पाटो बनेको छ।