राम्रो अनलाइन
१२ वैशाख २०७८, आइतबार
सुर्खेत । नेकपा एमालेले फ्लोर क्रस गरी मतदान गरेका कर्णाली प्रेदशका चारजना सांसदलाई प्रदेश सभा सदस्यबाट निष्कासन गरेको छ । निष्कासन गरिएको सूचनासहितको कारबाही पत्र आइतबार कर्णाली प्रदेश सभामा दर्ता भएको हो ।
नेकपा एमाले संसदीय दलका नेता यामलाल कंडेलले नेकपा माओवादी केन्द्रका मुख्यमन्त्री महेन्द्रबहादुर शाहीको पक्षमा फ्लोर क्रस गरी मतदान गरेर सरकार बचाउन भूमिका खेलेको भन्दै चार सांसदलाई निष्कासन गरेका हुन् ।
पदमुक्त हुने प्रदेश सभा सदस्यहरूमा प्रकाश ज्वाला, कुर्मराज शाही, अम्मरबहादुर थापा र नन्दसिंह बुढा छन् । ज्वालाबाहेक तीनजना माओवादी नेतृत्वको सरकारमा मन्त्री भइसकेका छन् ।
सांसदहरूलाई प्रदेशसभा सदस्य पदबाट मुक्त गराइएको पत्र प्रदेशसभामा दर्ता गरेको प्रदेशसभा सचिव जीवराज बुढाथोकीले जानकारी गराए । उनले भोली सोमबार हुने प्रदेशसभाको बैठकमा कारबाहीको पत्र छलफलमा लैजाने बताए ।
हाउस नचलेको अवस्थामा पत्र सूचना वोर्डमा टाँस हुने भएपनि हाउस भोलि भएको हुँदा उक्त कारबाही पत्र त्यसमै छलफल हुनने सचिव बुढाथोकीले बताए ।
नेकपा एमाले महाधिवेशन आयोजक कमिटीको शुक्रबार बसेको बैठकले पनि उनीहरूलाई प्रदेश सांसद र पार्टी साधारण सदस्यबाट निष्कासन गर्ने निर्णय गरेको थियो ।
.jpg)
