राम्रो अनलाइन
०७ पुस २०८२, सोमबार
विराटनगर– मोरङको विराटनगरस्थित दुई क्यासिनोबाट प्रहरीले २० नेपाली नागरिकलाई पक्राउ गरेको छ । पक्राउ पर्नेमा क्यासिनोका महाप्रबन्धक र व्यवस्थापक समेत छन् ।
देशमा नेपालीलाई क्यासिनोमा प्रवेश निषेध छ । तर, लामो समयदेखि लुकीछिपी जुवा खेलाइएको विशेष सूचनाका आधारमा कारबाही गरिएको प्रहरीले जनाएको छ । जिल्ला प्रहरी कार्यालय मोरङका प्रमुख एवं एसपी कवित कटुवालका अनुसार, विराटनगरस्थित बिग होटेलमा सञ्चालित च्याम्पियन जोन क्यासिनो र रत्ना होटेलको गोल्डेन क्यासिनोमा एकैसाथ छापा मारिएको थियो ।
राति करिब ११ बजे गरिएको कारबाहीका क्रममा गोल्डेन क्यासिनोका महाप्रबन्धक लोकेन्द्रबहादुर बस्नेत र च्याम्पियन जोनका व्यवस्थापक रामकृष्ण गौतम पक्राउ परेका छन् । रत्ना होटेलको क्यासिनोबाट १४ र बिग होटेलको क्यासिनोबाट ६ गरी कुल २० नेपालीलाई नियन्त्रणमा लिइएको प्रहरीले जनाएको छ ।
एसपी कटुवालका अनुसार, छापा मार्दा क्यासिनोभित्र नेपाली निर्बाध रूपमा जुवाजन्य खेल खेलिरहेको अवस्थामा फेला परेका थिए । कानुनविपरीत नेपालीलाई प्रवेश गराई जुवा खेलाएको पाइएकाले व्यवस्थापकसहित उपस्थित सबैलाई नियन्त्रणमा लिई अनुसन्धान सुरु गरिएको उनले बताए ।
पक्राउ परेका सबैलाई हाल जिल्ला प्रहरी कार्यालय मोरङको हिरासतमा राखिएको छ । उनीहरूमाथि जुवा ऐनअन्तर्गत मुद्दा दर्ता गरी थप कानुनी प्रक्रिया अघि बढाउने तयारी भइरहेको प्रहरीले जनाएको छ ।
.jpg)
