राम्रो अनलाइन
०५ जेठ २०८३, मङ्गलबार
.jpg)
काठमाडौं– फिफा विश्वकप २०२६ सुरु हुन अब केही सातामात्र बाँकी रहँदा भारतमा प्रतियोगिताको प्रसारण अधिकार अझै टुंगो लाग्न सकेको छैन । समाचार संस्था रोयटर्सका अनुसार फिफाको मिडिया अधिकार अधिकारीहरू यसै साता भारत भ्रमणमा रहेका छन् ।
प्रसारण अधिकारको मूल्यलाई लिएर फिफा र भारतीय मिडिया कम्पनीहरूबीच सहमति नजुट्दा करोडौँ फुटबल समर्थक विश्वकप प्रत्यक्ष हेर्नबाट वञ्चित हुने सम्भावना बढेको बताइएको छ ।
भारतको सबैभन्दा ठूलो मिडिया कम्पनी रिलायन्स–डिज्नी संयुक्त उद्यमले विश्वकप प्रसारण अधिकारका लागि गरेको प्रस्ताव फिफाले अस्वीकार गरेको थियो । त्यस्तै, फिफाले गरेको माग उनीहरूले अस्वीकार गर्दा सम्झौता हुन नसकेको रोयटर्सले जनाएको छ ।
यसैबीच, अर्को प्रमुख मिडिया कम्पनी सोनीले पनि अधिकार खरिद प्रक्रियामा खास रुचि नदेखाएको बताइएको छ । फिफा र भारतीय पक्षबीच वार्ता जारी रहे पनि औपचारिक सहमति भने अझै हुन सकेको छैन ।
फिफाले विश्वका १८० भन्दा बढी क्षेत्रमा प्रसारण सम्झौता सम्पन्न भइसकेको जानकारी दिँदै भारतसम्बन्धी छलफल गोपनीय चरणमा रहेको जनाएको छ ।
विश्वकप आगामी जुन ११ देखि सुरु हुँदै छ। सम्झौता ढिलो हुँदा प्रसारण पूर्वाधार निर्माण, विज्ञापन व्यवस्थापन तथा डिजिटल प्लेटफर्म तयारीका लागि समय अभाव हुने देखिएको छ ।
क्रिकेट अत्यधिक लोकप्रिय रहेको भारतमा पनि फुटबल समर्थकको संख्या ठूलो रहेको छ । डेलोइट र गुगलको २०२४ को प्रतिवेदनअनुसार भारतमा करिब ८५ मिलियन फुटबल समर्थक रहेका छन् । २०२२ विश्वकपमा भारतले विश्वव्यापी टेलिभिजन दर्शकमध्ये २।९ प्रतिशत हिस्सा ओगटेको थियो ।
.jpg)
.jpg)
