गुरु केदार बराल
२९ असार २०८३, सोमबार
मानिसको जीवनमा धेरै प्रकारका ‘बार’ आउँछन्। समयले बारम्बार परीक्षा लिन्छ, परिस्थितिले बारम्बार चुनौती दिन्छ, र जीवनका अनेक मोडले मानिसलाई बारम्बार संघर्ष गर्न सिकाउँछन्। तर यिनै सबै ‘बार’लाई पार गर्दै अन्ततः मानिसले पुग्ने सबैभन्दा अमूल्य स्थान भनेको परिवार हो।
परिवार केवल रगतको सम्बन्ध मात्र होइन, यो प्रेम, विश्वास, त्याग, सम्मान, जिम्मेवारी र आत्मीयताको पवित्र बन्धन हो। संसारले साथ छोडेको बेला पनि परिवारले साथ दिन सक्छ। दुःखका आँसु पुछ्ने हात, असफलतामा हौसला दिने आवाज र सफलतामा सबैभन्दा धेरै खुसी हुने मन परिवारकै हुन्छ।
जीवनमा सुरुमा दुःख आउन सक्छ। संघर्ष गर्नुपर्छ, अभाव सहनुपर्छ, धेरै सपना अधुरा रहन सक्छन्। तर धैर्य, इमानदारी र परिवारको साथ भए त्यो दुःख नै एक दिन सुखमा बदलिन्छ। त्यस्तै, सुख आएको बेला पनि घमण्ड गर्नु हुँदैन, किनकि जीवन सधैं एउटै अवस्थामा रहँदैन। सुखपछि फेरि परीक्षा आउन सक्छ। त्यसैले दुःखमा नआत्तिने र सुखमा नमातिने मानिस नै वास्तवमा सफल हुन्छ।
परिवारलाई समय दिनुहोस्, सम्मान गर्नुहोस्, एकअर्कालाई बुझ्नुहोस् र कठिन समयमा एकअर्काको सहारा बन्नुहोस्। पैसा, सम्पत्ति र पद फेरि कमाउन सकिन्छ, तर टुटेको सम्बन्ध जोड्न धेरै कठिन हुन्छ। त्यसैले परिवारलाई माया गर्नु, संरक्षण गर्नु र एकतामा बाँधेर राख्नु प्रत्येक व्यक्तिको पहिलो कर्तव्य हो।
याद राखौं, संसारका धेरै ‘बार’ पार गर्न सकिन्छ, तर जीवनको सबैभन्दा बलियो, सबैभन्दा सुन्दर र सबैभन्दा मूल्यवान् ‘बार’ भनेको परिवार हो। परिवार बलियो भए जीवनका आँधी–हुरी पनि सजिलै पार गर्न सकिन्छ।
