नाच्न नजान्ने प्रियंका

बलिउडदेखि हलिउडसम्म प्रख्यात रहेकी अभिनेत्री प्रियंका चोपडाले एक पटक डान्स स्टेप नआउँदा गाली खानुपरेको बताएकी थिइन् । एक अन्तर्वार्तामा प्रियंकाले यस घटनाबारे बताएकी थिइन् । कुरा फिल्म ‘अन्दाज’ को हो । फिल्मको सुुटिङ दक्षिण अफ्रिकामा हुँदै थियो । फिल्ममा हिरो थिए, अक्षय कुमार । ‘रोमान्टिक सिन थियो,’ अन्तर्वार्तामा प्रियंकाले भनेकी थिइन्, ‘एकै पटक धेरै कुरामा फोकस गर्नुपर्ने थियो । ४० टेक दिइसकेकी थिएँ । तैपनि, डान्सको स्टेप ठीक तरिकाले भइरहेको थिएन ।’ त्यतिखेर कोरियोग्राफर थिए, सरोज खानका छोरा राजु खान । ‘राजुले रिसाएर माइक फ्याँकिदिए,’ प्रियंकाले सम्झिइन्, ‘ उनले ‘पहिले स्टेप सिक, त्यसपछि आउनू’ भने । ‘मिस वल्र्ड हुँदैमा अभिनेत्री बन्न सकिन्छ भन्ने भ्रम नपाले हुन्छ’ पनि भनेका थिए ।’ त्यस बेला अक्षय कुमारकी श्रीमती ट्वींकल खन्नाले बच्चा जन्माउने समय नजिकिँदै थियो । सुटिङको समय घटाएर सबै जना भारत फर्किए । भारत फर्किएपछि प्रियंकाले वीरु कृष्णनसँग नृत्य सिकिन् । हरेक दिन छ घण्टा उनी नृत्य अभ्यास गर्थिन् ।

पछुताउँदै दीपिका

अमेरिकी अश्वेत नागरिक जर्ज फ्लोइडको हत्यापछि सामाजिक सञ्जालमा ‘ब्ल्याक लाइभ्ज म्याटर’ ट्रेन्ड चल्यो । भारतमा पनि यो ट्रेन्डले गति लियो । केही बलिउड सेलिब्रिटी पनि विरोधमा उत्रिए । अभियानको समर्थनमा रहेका केही सेलिब्रिटीलाई सामाजिक सञ्जाल प्रयोगकर्ताले नराम्ररी कुरा सुनाएका छन् । सोसल मिडिया प्रयोगकर्ताले सेलिब्रिटीले फेयरनेस क्रिमलगायत विभिन्न गोरो बनाउने सौन्दर्य सामग्रीको प्रचार गरेको आरोप लगाएका छन् । यस आलोचनापछि अभिनेत्री दीपिका पादुकोणले आफूले गरेको केही विज्ञापनप्रति खेद प्रकट गरेकी छिन् । दीपिका पनि फेयरनेस क्रिम र कोला ब्रान्डसँग आबद्ध थिइन् । आफूले ब्रान्ड छनोट गर्दा गल्ती गरेको उनले स्वीकार गरेकी छिन् । त्यसका लागि उनी पछुतो मानिरहेकी छिन् । उनले आफूलाई ती ब्रान्डबाट अलग गरिसकेको जनाएकी छिन् ।

अनुष्काको नयाँ साथी

लकडाउनमा घरबन्दीमा परेकी अभिनेत्री अनुष्का शर्मा अहिले श्रीमान् विराट कोहलीसँग समय बिताइरहेकी छिन् । बेला–बेलामा उनले कोरोना भाइरसप्रति सचेत गराउने खालका भिडियो सेयर गर्ने गरेकी छिन् । हालै, उनले आफूले घरभित्रै केही साथी बनाएको बताएकी छिन् । आफ्नो इन्स्टाग्राम अकाउन्टमा फोटो सेयर गरेकी छिन् । फोटोमा उनी बोटबिरुवासँग छिन् । अनुष्का प्रकृतिप्रेमी हुन् । उनले आफ्नो घरमा फूल रोपिएका थुप्रै गमला राखेकी छिन् । तिनको नियमित हेरचाह पनि गर्छिन् । ती बोटबिरुवा आफ्ना साथी बनेका उनले बताएकी छिन् । इन्स्टाग्राममा तस्बिर राखेर उनले क्याप्सन लेखेकी छिन्– ‘म र मेरा साथी ।’