राम्रो अनलाइन
२१ वैशाख २०७८, मङ्गलबार
काठमाडौँ । प्रधानमन्त्री केपी शर्मा ओलीले २७ बैशाखमा विश्वासको मत लिन प्रतिनिधि सभाको अधिवेशन आह्वान गरेपछि प्रमुख प्रतिपक्षी नेपाली कांग्रेसले त्यससम्बन्धमा कसरी अगाडि बढ्ने भन्नेबारे रणनीति बनाउन लागेको छ । कांग्रेसले त्यसबारे छलफल गर्न आज पदाधिकारी बैठक बोलाएको छ ।
दिउँसो २ बजे पार्टी सभापति शेरबहादुर देउवा निवास बुढानिलकण्ठमा पदाधिकारी बैठक बोलाइएको कांग्रेस प्रतिनिधि सभाका प्रमुख सचेतक बालकृष्ण खाणले जानकारी दिए । बैठकले ओलीलाई विश्वासको मत पुग्न नदिन अन्य दलसँग छलफल गर्ने निर्णय गर्नेछ ।
२७५ सदस्यीय प्रतिनिधि सभामा माओवादीका चार सांसदको पार्टी छोडेर एमाले प्रवेश गरेपछि पद खारेज भएको छ । यसबाट अब प्रतिनिधिसभा २७१ सदस्यीय छ ।
निलम्बित सांसद सभामा भाग लिन नपाउने भए पनि संख्या गनिन्छ । तसर्थ ओलीलाई विश्वासको मत पुर्याउन २७१ को बहुमत संख्या १३६ सांसद आवश्यक पर्छ ।
अहिले एमालेसाँ १२१ सिट छ । माओवादीसँग ४९, कांग्रेससँग ६१ (निलम्बित बाहेक) र जनता समाजवादी पार्टीसँग ३२(निलम्बित बाहेक) सांसद छन् । माओवादीले अहिलेसम्म प्रधानमन्त्री ओलीलाई दिएको समर्थन फिर्ता नलिएकाले बहुमतमै छन् ।
कांग्रेसले माओवादीले समर्थन फिर्ता लिने निश्चित भएको भन्दै अब बहुमत पुग्न नदिने गरी सबैदलसँग छलफल गर्ने संस्थागत निर्णय गर्ने कांग्रेस केन्द्रीय सदस्य एनपी साउदले जानकारी दिए ।
सत्तारुढ दल एमालेभित्र नेता माधवकुमार नेपाल र झलनाथ खनाल समूह असन्तुष्ट रहेकाले उनीहरूसँग, माओवादी र जसपासँग छलफल गरेर बहुमत पुग्न नदिन भरमग्दुर प्रयास गर्ने साउदले बताए । जसपामा पनि ओलीलाई समर्थन गर्ने कि नगर्ने भन्ने विषयमा मतैक्यता छैन ।
अध्यक्ष महन्थ ठाकुर पक्ष ओलीलाई सहयोग गर्ने र उपेन्द्र यादव पक्ष सहयोग गर्न नहुने पक्षमा छ । कांग्रेसले एमालेलाई एक ढिक्का हुन नदिने रणनीति बन्ने प्रयास गर्ने नेताहरू बताउँछन् ।
.jpg)
.jpg)
.jpg)
