राम्रो अनलाइन
०२ फागुन २०८१, शुक्रबार
सुरक्षा पन्त, अभिनेत्री
मलाई ब्लेजर, सर्ट र सल पहिरनमा माया बसेको छ । फर्मल र क्याजुअल मिक्स गरेर आफूलाई सजाउन मन लाग्छ । मसँग छ÷सात वटा ब्लेजर छन् । हलुका गुलाबी, नीलो, कालो, चेक, जिन्स, क्रिम रङका ब्लेजर छन् मसँग । सर्टमा सेतो, कालो, चेक सर्ट मन पर्छ । म सलप्रेमी पनि हुँ । १०–१५ वटा सल मेरो कलेक्सनमा छन् ।
अन्जु पन्त, गायिका
मलाई गाउनप्रेमी भने पनि हुन्छ । लगाउन सहज हुन्छ, झन्झट हुँदैन त्यसैले गाउन असाध्यै मन पर्छ । लामो र ढाकाको डिजाइन गरेको गाउन मेरो फेभरेट हो । धेरैजसो ढाका फेब्रिककै गाउन लगाउने गर्छु । लगाउन सहज हुने र स्टाइलिस देखिने भएकाले गाउन रुचाउँछु । मसँग गाउनको राम्रै कलेक्सन छ ।
राधिका हमाल, गायिका
मसँग सारीको राम्रो कलेक्सन छ । मलाई सारीमै माया बसेको छ । जानी नजानी १७/१८ वर्षको उमेरदेखि सारीप्रति आकर्षित भएँ । ढाकाको मिक्स गरेर रेडिमेड सारी लगाउन रुचाउँछु । सारीमा ठाटिँदा आफू राम्री देखिन्छु जस्तो लाग्छ । मसँग सबै रङका सारी छन् ।
दीपिका प्रसाईं, अभिनेत्री
मलाई वानपिस ड्रेस खूब मन पर्छ । अरूले पनि मलाई वानपिसमै राम्रो देखिन्छ भनेर कमेन्ट गर्छन् । सबै खालका पहिरन मसँग भए तापनि कार्यक्रमतिर जाँदा वानपिस नै लगाउँछु । लगाउँदा सहज हुने, स्टाइलिस पनि देखिने भएकाले वानपिसमै मेरो प्रेम बसेको छ ।
प्रस्तुतिः रचना
