राम्रो अनलाइन
२८ जेठ २०८१, सोमबार
बझाङ– विपद् व्यवस्थापनको खोज तथा उद्धारका लागि नमुना अभ्यास गर्ने क्रममा आज बझाङमा डुबेर एक प्रहरी जवानको मृत्यु भएको छ । सदरमुकाम चैनपुर नजिकै सेती नदीमा नमुना अभ्यास देखाउने क्रममा सशस्त्र प्रहरी बलका जवान नरेन्द्रसिंह धामीको मृत्यु भएको हो ।
प्रहरी नायब उपरीक्षक भरत शाहका अनुसार केदारस्यूँ गाउँपालिका-७ खिकीरीका बासिन्दा रहनुभएका उहाँको अभ्यासको क्रममा सेती नदीको बिच भागमा खसेर ज्यान गएको हो । नेपाल प्रहरी, सशस्त्र प्रहरी बल, जिल्ला रेडक्रस र नेपाली सेनाले आज यहाँ संयुक्तरुपमा प्राकृतिक विपद्का बेला बाढीमा फसेकाहरुको उद्धारसम्बन्धी नमुना अभ्यास देखाएको थियो । सोही क्रममा धामी डुबेर बेहोस भएका जिल्ला प्रहरी कार्यालयले जनाएको छ । बेहोस भएका उनलाई जिल्ला अस्पताल लगिए पनि बचाउन भने नसकिएको प्रहरीले जनाएको छ ।
