राम्रो अनलाइन
१७ जेठ २०८२, शनिबार
विश्वको ध्यान अहिले भारत तेलंगानातर्फ केन्द्रित भएको छ, जहाँ ७२औँ मिस वर्ल्ड महोत्सवको प्रतिक्षित ग्रान्ड फिनाले शनिबार नेपाली समय अनुसार साँझ ६ः४५ बजे हैदराबादस्थित हाईटेक्स प्रदर्शनी केन्द्रमा सम्पन्न हुँदैछ। यसपटक नेपाललाई सृच्छा प्रधानले प्रतिनिधित्व गरिरहेकी छन् ।
एक महिनासम्म तेलंगानाभर गरिएका उद्देश्यकेन्द्रित कार्यक्रम, सांस्कृतिक आदानप्रदान र चुनौतीहरू पश्चात १०८ जना विश्वभरिका प्रतियोगीहरू भव्य उत्सवमा मिस वर्ल्डको ताजका लागि प्रतिस्पर्धा गर्दैछन्।
ग्रान्ड फिनालेको होस्टिङ मिस वर्ल्ड २०१६ स्टेफानी डेल भ्यालेले भारतीय प्रस्तोता साचिन कुम्भारसँग संयुक्त रूपमा गर्नेछिन्। कार्यक्रममा बलिउड कलाकार ज्याक्लिन फर्नान्डिस र इशान खट्टरको लाइभ प्रस्तुति पनि रहनेछ।
प्रख्यात मानवतावादी तथा अभिनेता सोनु सूदलाई प्रतिष्ठित मिस वर्ल्ड ह्युमनिटेरियन अवार्ड प्रदान गरिनेछ। उनी निर्णायकको रूपमा समेत सहभागी हुनेछन्। निर्णायक मण्डलमा २०२५ का ‘ब्युटी विथ अ पर्पस’ की ग्लोबल एम्बासडर सुधा रेड्डी, मिस इङ्गल्याण्ड २०१४ डा. करिना टुरेल (सार्वजनिक स्वास्थ्य चिकित्सक, समाजसेवी, लगानीकर्ता तथा क्याम्ब्रिज विश्वविद्यालयकी फेलो), तथा वर्तमान मिस वर्ल्ड क्रिस्टिना पिस्कोभा पनि सहभागी हुनेछन्। निर्णायक मण्डलको नेतृत्व मिस वर्ल्डकी अध्यक्ष जुलिया मोरली सीबीईले गर्नेछिन् र विजेता घोषणा गर्नेछिन्। मिस वर्ल्ड २०१७ तथा बलिउड अभिनेत्री मनुषी छिल्लरको विशेष उपस्थितिसमेत रहनेछ।
छनोट प्रक्रिया
प्रत्येक महादेशबाट १० जना क्वार्टरफाइनलिस्टबाट टप ५ छनोट गरिनेछ, त्यसपछि टप २ र अन्ततः चार महादेशीय विजेताहरू। यी विजेताहरूले अन्तिम प्रश्नको उत्तर दिनेछन् र त्यसपछि नयाँ मिस वर्ल्डको चयन हुनेछ।
प्रतियोगीहरूले राष्ट्रिय पोशाक, साँझको पहिरन, तथा आधिकारिक फेसन डिजाइनर अर्चना कोचको रचनाहरूमा र्याम्प वाक गर्नेछन्। समापनमा क्रिस्टिना पिस्कोभा ७१औँ मिस वर्ल्ड) ले नयाँ मिस वर्ल्डलाई ताज पहिर्याउनेछिन्।
