संगीतमा पहिलो 

दुई दशकभन्दा लामो समयदेखि सांगीतिक क्षेत्रमा सक्रिय गायक भीषण मुकारुङको गीत ‘अँधेरीमा जुन फुल्दा’ कुनै समय रेडियोमा चर्चित थियो । पछिल्लो समय भीषणको आफ्नै शब्द, संगीत र स्वर रहेको गीत ‘खोर्सानी डल्ले’ चर्चामा छ । उनले संगीतमा संघर्ष गर्दाका पहिलो अनुभव ‘सम्पूर्ण’ का लागि गोपाल दाहालसँग बाँडेका छन् । 

रेकर्ड भएको पहिलो गीत 

भोजपुरमा कक्षा छ पढ्दादेखि नै स्कुल र गाउँमा गीत गाउँथेँ । त्यतिबेलै ‘यसले राम्रो गाउँछ’ भनेर सबैले हौसला दिन्थे । एसएलसी सकेर कलेज पढ्न इटहरी झरियो । त्यही बेला २०४९÷०५० सालतिर दाजु पारस मुकारुङको एकल संगीतमा एल्बम निस्किने भयो । दाजुको एल्बम ‘फेरि याद आयो’का लागि रमेश क्षितिजको शब्दमा ‘वसन्त लाग्यो क्यारे’ बोलको गीत रेकर्ड गरेँ ।

गीत रेकर्ड गर्नका लागि काठमाडौँ आएको थिएँ । त्यो बेला गीत गाउन पाउनु नै ठूलो कुरा थियो । एउटा प्राइभेट स्टुडियोमा रेकर्ड गर्न गइयो । उमेर पनि कच्चा नै थियो । अनुभव थिएन । स्टुडियो भन्नेबित्तिकै अर्कै ग्रहजस्तो लाग्थ्यो । डर धेरै लाग्थ्यो । रेकर्डमा धेरै टेक खाएँ । त्यो भन्दाअघि कहिले स्टुडियो छिरेको थिइनँ । अहिले सम्झिँदा किन त्यति सारो डराएछु जस्तो लाग्छ । 

हिट भएको पहिलो गीत 

अहिलेसम्म मेरा तीन सयजति गीत रेकर्ड भए । त्यसमध्ये २०५८ सालमा रेकर्ड भएको गीत ‘अँधेरीमा जुन फुल्दा’ले मलाई संगीत क्षेत्रमा स्थापित गरायो । नवीन दाहालको शब्द, पारस मुकारुङको संगीतमा मेरो आफ्नै एल्बम ‘विश्वासको बन्धन’मा समावेश भएको यो गीत म्युजिक नेपालमा रेकर्ड भएको थियो । 

पहिलो म्युजिक भिडियो

पहिला भिडियो बनाउन महँगो थियो । आर्थिक कारणले मैले सुरुका कुनै गीतको भिडियो बनाउन सकिनँ । २०६२÷०६३ सालतिर मेरो एल्बम ‘सक्सेस’ को गीत ‘मेरो मुटु भन्छ्यौै मलाई’ को पहिलो भिडियो बन्यो । पहिला आफ्नो स्वर मात्र सुन्न पाइन्थ्यो । भिडियोमा आफू पनि देखिन पाउँदा रमाइलो लाग्यो । 

पहिलो संगीत

मैले पहिलो पटक संगीत गरेको एउटा राष्ट्रिय भावको गीत थियो । त्यो पावल चाम्लिङले गाएका थिए । अहिलेसम्म करिब २० वटामा संगीत भरेँ  । त्यसमा अहिले बजारमा आएको आफ्नै गीत ‘खोर्सानी डल्ले’ले बढी चर्चा पायो । युट्युबमा करिब नौ लाखले भिडियो हेरेका छन् । स्रोताले यति धेरै मन पराइदिएको मेरो संगीतको गीत यही नै हो । यसैले गर्दा कार्यक्रममा पनि व्यस्त बनियो ।

पहिलो अन्तर्वार्ता

‘अँधेरीमा जुन फुल्दा’ गीत बजारमा आएपछि रेडियो नेपालमा २०५८ तिर अमरध्वज लामाले पहिलो पटक अन्तर्वार्ता लिनुभएको थियो । पहिलादेखि गायक हुन्छु भन्ने ठूलो सपना थियो । गायककै हैसियतमा अन्तर्वार्तामा जाँदा एकदम खुशी थिएँ । त्यो बेला रेडियो नेपालको ठूलो प्रभाव थियो । के बोल्ने, कसो बोल्ने भन्ने लाग्यो । अलि अप्ठ्यारो पनि लाग्यो । लाइभ इन्टरभ्यूमा धेरै डराएको थिएँ । मान्छेले कसरी जाँचिरहेका होलान् भन्ने लाग्थ्यो । 

पहिलो कन्सर्ट

भोजपुरमा २०५८ सालमा पहिलो कला साहित्य संगीत महोत्सव भएको थियो । मैले आफ्नो एल्बम त्यही महोत्सवमा विमोचन गरेँ । पहिला पनि सानातिना कार्यक्रममा त गाएको थिएँ तर त्यहाँ महोत्सवमा हजारौँ मान्छेमाझ एल्बमको गीत ‘अँधेरीमा जुन फुल्दा’ पहिलो पटक गाएँ । आफ्नै ठाउँ भएकाले आत्मविश्वास थियो । स्रोता दर्शकले पनि खूब मन पराए । एक सयजति एल्बम पनि लगेको थिएँ, तुरुन्तै सबै बिक्री भयो । एल्बम नपुगेर मान्छेले डबिङ पनि किनबेच गरे । त्यो गीत पनि रेडियोमा बज्न थालेपछि हिट भयो ।

पहिलो पारिश्रमिक

२०५१ सालतिर विराटनगरमा रेडियो नेपालको आधुनिक गीत प्रतियोगितामा टप १० भएपछि रेडियोमा रेकर्ड गर्न बाटो खुलेको थियो । तर, त्यसअघि नै पारस दाजुको संगीतमा एउटा राष्ट्रिय गीतमा समूहमा गाउन रेडियो नेपाल पुगेको थिएँ । त्यो गीत रेकर्ड भइसकेपछि ५० रुपैयाँ पाएँ । त्यतिबेलासम्म गीत गाउँदा पैसा पाइन्छ भन्ने थाहै थिएन । पैसा पाउँदा अचम्म लाग्यो ।