राम्रो अनलाइन
०५ माघ २०७७, सोमबार
सोलुखुम्बुमा टिपर दुर्घटना हुँदा तीन जनाको घटनास्थलमै ज्यान गएको छ । निर्माणाधीन ८६ मेगावाटको सोलुखोला दूधकोशी जलविद्युत आयोजनाको सामान लाने क्रममा आइतबार राति दुर्घटना हुँदा अर्का एक जना घाइते भएको प्रहरीले जानकारी दिएको छ ।
सोलुदूधकुण्ड नगरपालिका–११ बरडाँडा गिद्धेभीरमा बा ४ ख ७९८० नम्बरको टिपर राति करिब ११ बजे दुर्घटनामा परेको हो ।
दुर्घटनामा धादिङ घर भएका चालक कमल मगर, मकवानपुरका राजकुमार मगर र सप्तरी सुरुङ्गाका कृष्णलाल चौधरीको मृत्यु भएको सोलुखुम्बु ट्राफिक प्रहरी प्रमुख सहायक निरीक्षक कृष्ण कटुवालले जानकारी दिए ।
दुर्घटनामा गम्भीर घाइते मकवानपुर जिल्ला बागमती गाउँपालिका–४ का रमेश मगरको उपचारका लागि अस्पताल लगिएको छ ।
सडकबाट खसेको टिपर दुई टुक्रा भएको प्रहरीले बताएको छ । अगाडिको भाग करिब सय मिटर तल पुगेको थियो भने पछाडिको भाग करिब तिन सय मिटर तल पुगेको असई कटुवालले जानकारी दिए ।
