राम्रो अनलाइन
२० जेठ २०८१, आइतबार
काठमाडौं– विभागीय टोली नेपाल पुलिस क्लबले आठौं प्रधानमन्त्री कप एनभिए महिला तथा पुरुष भलिबल लिगमा महिलातर्फ न्यु डायमन्ड स्पोर्टस क्लबविरुद्ध ३-१ को पुनरागम जित निकालेको छ ।
त्रिपेरेश्वरस्थित राष्ट्रिय खेलकुद परिषद्( राखेप) को कभर्डहलमा आइतबार पहिलो सेट १९-२५ ले गुमाएको पुलिसले त्यसपछिका तीन सेट २५-२२, २५-२२,२९-२७ ले आफ्नो पक्षमा पार्यो ।
जितसँगै पुलिसले दुई खेलमा पाँच अंक जोडेको छ । लगातार दोस्रो पराजय ब्यहोरेको न्यु डायमन्डको एक अंक छ ।
पहिलो खेलमा पुलिसले त्रिभुवन आर्मी क्लबलाई ३-२ को सेटमा पराजित गरेको थियो । न्यु डयमन्डले नेपाल एपिएफ क्लबसँग ३-२ कै हार ब्यहोरेको थियो ।
आइतबार नै सम्पन्न महिलातर्फको पहिलो खेलमा एभरेस्ट भलिबल क्लबले कर्णाली प्रदेशलाई ३-० को सोझो सेटमा हयायो । एभरेस्टले खेल २५-१६, २५-८, २५-१० ले आफ्नो पक्षमा पार्यो ।
.jpeg)
