एजेन्सी
०८ फागुन २०७७, शनिबार
बलिउडका केही कलाकार यस्ता छन्, जसले फिल्म जगत् त्यागेर अन्य क्षेत्रमा करिअर बनाएका छन्।
डिनो मोरिया
डिनो मोरियाले मोडलिङबाट करिअरको सुरुवात गरेका थिए । त्यसपछि उनको करिअर बलिउडतिर मोडियो । ‘प्यार में कभी कभी’ बाट उनले फिल्म यात्रा थालेका थिए । थ्रिलर फिल्म ‘राज’ बाट उनी प्रसिद्ध भए । तर, त्यसपछिका उनको फिल्मले सफलताको स्वाद खासै चाखेनन् । फिल्म असफल हुन थालेपछि उनी हस्पिटालिटी बिजनेसतिर लागे । अहिले मुम्बईमा उनका थुप्रै रेस्टुरेन्ट छन् ।
प्रीति जिन्टा
अभिनेत्री प्रीति जिन्टा फिल्म ‘दिल से’ मा पहिलो पटक फिल्मी पर्दामा देखिएकी थिइन् । फिल्ममा उनले अभिनेता शाहरूख खान र अभिनेत्री मनीषा कोइरालासँग काम गरेकी थिइन् । सफलताको भ¥याङ चढ्दै उनी बलिउडका टप अभिनेत्रीको सूचीमा सामेल भइन् । ‘दिल चाहता है’, ‘वीर जारा’, ‘कल हो न हो’ लगायत उनका हिट फिल्म हुन् । फिल्म सँगसँगै उनले खेल क्षेत्रमा पनि हात हालिन् । इन्डियन प्रिमियर लिग (आईपीएल) को किंग्स इलेभन पञ्जाब टिममा लगानी गरिन् । आजभोलि उनी फिल्मभन्दा क्रिकेटमा बढी रमाइरहेकी छिन् ।
ट्वींकल खन्ना
अभिनेत्री ट्वींकल खन्नाले सन् १९९५ मा फिल्म ‘बरसात’ बाट बलिउडमा डेब्यू गरेकी थिइन् । फिल्ममा उनले अभिनेता बबी देओलसँग काम गरेकी थिइन् । त्यसपछि ‘बादशाह’, ‘लभ के लिए कुछ भी करेगा’, ‘ये है मुम्बई मेरी जान’ लगायत फिल्ममा काम गरिन् । बलिउडमा करिअर सुरु गरेको छ वर्षमै उनी इन्डस्ट्रीबाट बिदा भइन् ।
ट्वींकलको लेखनमा रुचि छ । उनका ‘मिसेस फनीबोन्स’, ‘द लिजेन्ड अफ लक्ष्मीप्रसाद’ लगायत किताब प्रकाशित छन् । पत्रपत्रिकामा स्तम्भकार छिन् । इन्टेरियर डिजाइनिङमा दख्खल भएकी उनी एक लाइफ स्टाइल वेबसाइटकी सञ्चालक पनि हुन् ।
