राम्रो अनलाइन
०४ जेठ २०८१, शुक्रबार
काठमाडौं– ‘मिस पिंक २०२४’ को उपाधिको ताज अनमोल राईले पहिरिएकी छन् । राष्ट्रिय नाचघरमा बिहीबार सम्पन्न फाइनलमा उनी विजेता घोषित भएकी हुन् । उनले एक लाख नगद पुरस्कार समेत हात परेकी छन् ।
१८ प्रतिस्पर्धीबाट राई प्रथम घोषित भएकी हुन् । विजेता बनेकी उनी थाइल्यान्डमा आयोजना हुने मिस इन्टरनेसनल क्विनमा नेपालको प्रतिनिधि बनेर सहभागी हुन पाउने छिन् । त्यस्तै, फस्ट रनर अपको उपाधि जितेकी सरोसी न्यौपानेले ७५ हजार रुपैयाँ पाएकी छन् । सेकेन्ड अनरअपको उपाधि जितेकी आरोही बस्नेतले ५० हजार रुपैयाँ पाएकी छन् ।
लैंगिक तथा यौनिक अल्पसङ्ख्यक समुदायमाथि हुने घृणाविरुद्धको अन्तर्राष्ट्रिय दिवसका अवसर पारेर यस प्रतियोगिता सम्पन्न गरिएको हो ।
ब्लु सोसाइटीले यौनिक तथा लैङ्गिक अल्पसङ्ख्यक समुदायको हक अधिकारका लागि ‘मिस पिंक’को आयोजना गर्दै आएको छ । ट्रान्स वुमनहरुको बौद्धिक तथा सौन्दर्य प्रतियोगिता स्वरूप आयोजना गरिँदै आएको छ ।
