जयन सुब्बा मानन्धर
०२ भदौ २०८२, सोमबार
काठमाडौँ– ‘मिसेस नेपाल अस्ट्रेलिया २०२५’को कोरियोग्राफी रोजिन शाक्यले गर्ने भएका छन् । हिमाली कल्चर ग्रुप मेलबर्न र इभेन्ट्स नेपाल अस्ट्रेलियाको सहकार्यमा आयोजना हुने प्रतियोगिता लागि उनी आधिकारिक कोरियोग्राफर चुनिएका हुन् ।
अस्ट्रेलियामा बसोबास गर्ने विवाहित नेपाली महिलाहरूको प्रतिभा, पहिचान र सामर्थ्यलाई उजागर गर्ने उद्देश्यले सुरु गरिएको यो एक प्रेरणादायक पहल हो । शाक्यको नियुक्तिसँगै प्रतियोगितामा सहभागी हुने प्रतिस्पर्धीहरूलाई अन्तर्राष्ट्रिय स्तरको नृत्य, प्रस्तुति र व्यक्तित्व विकास सम्बन्धी तालिम प्रदान गरिनेछ । कार्यक्रममा इभेन्ट व्यवस्थापन सिजन मिडियाले गर्नेछ।
दुई दशकभन्दा बढीको अनुभव बोकेका शाक्यलाई नेपालको सबैभन्दा सफल फेसन कोरियोग्राफरहरूमध्ये एक मानिन्छ । उनले १२०० भन्दा बढी कार्यक्रमहरू कोरियोग्राफ गरिसकेका छन्, जसमा ३०० भन्दा बढी फेसन शो र अन्तर्राष्ट्रिय स्तरका सौन्दर्य प्रतियोगिताहरू जस्तै हेरिटेज पेजेन्ट्स, मिस मरमेड सिंगापुर, मोडल सुपरस्टार मुम्बई र मिस तामाङ वर्ल्ड जस्ता इभेन्टहरू समावेश छन् ।
