राम्रो अनलाइन
२८ चैत २०७७, शनिबार
काठमाडौं । इन्डियन प्रिमियर लिग (आईपीएल) को पहिलो खेलमा रोयल च्यालेन्जर्स बेङ्गलोरले साविक विजेता मुम्बई इन्डियन्सलाई २ विकेटले पराजित गरेको छ ।
शुक्रबार राति चेन्नईस्थित एमए चिदम्बरम रंगशालामा टस हारेर ब्याटिङ गरेको मुम्बईले निर्धारित २० ओभरमा सबै विकेट गुमाएर १५९ रनको योगफल तयार गरेको थियो ।
१६० रनको लक्ष्यसहित जवाफी ब्याटिङमा उत्रिएको बेङ्गलोरले २० ओभरमा ८ विकेट गुमाएर लक्ष्य पूरा गर्यो । बेङ्गलोरका लागि एबी डि भिलियर्सले २७ बलमा ४ चौका र २ छक्कासहित सर्वाधिक ४८, ग्लेन मेक्सवेलले ३९, कप्तान विराट कोहली ३३ रन जोडे । अन्य ब्याट्सम्यानले उल्लेख्य प्रदर्शन गर्न सकेनन् ।
मुम्बईका लागि जसप्रित बुमराह र मार्को जान्सेनले २, २ तथा ट्रेन्ट बोल्ट र क्रुनाल पान्डेयले १, १ विकेट लिए ।
त्यसअघि, पहिलो इनिङमा ब्याटिङ गरेको मुम्बईका लागि क्रिस लिनले सर्वाधिक ४९, सुर्यकुमार यादवले ३१, इशान किशानले २८ र कप्तान रोहित शर्माले १९ रन बनाए ।
बेङ्गलोरका लागि हर्षल पटेलले सर्वाधिक ५ तथा काइल जेमिसन र वासिङ्टन सुन्दरले १, १ विकेट लिए ।।
