एजेन्सी
०७ फागुन २०७७, शुक्रबार
बलिउड अभिनेत्री जया बच्चनले सात वर्षपछि चलचित्रमा फर्किने निर्णय गरेकी छिन्। पछिल्लो समय राजनीतिमा बढी सक्रिय रहेकी उनी अब सात वर्षपछि चलचित्रमा अभिनय गर्न लागेकी हुन् ।
उनी मराठी चलचित्र मार्फत चलचित्र अभिनयमा फर्किन लागेकी हुन् ।
नाम गोप्य राखिएको चलचित्रलाई मराठी निर्देशक गजेन्द्र अहिरेले निर्देशन गर्नेछन् । उनले ‘शेवरी, अनुमति र द साइलेन्स बीइंग क्रिटिकल’ जस्ता ५० भन्दा बढी चलचित्रको निर्देशन गरिसकेका छन् । अब उनको चलचित्रमा जया बच्चन देखिन भएकी छिन् । यो चलचित्रको छायांकन २० दिनमा पूरा हुने बताइएको छ । पहिलो पटक मराठी चलचित्रमा अभिनय गर्न जया उत्साहित देखिएकी छिन् ।
उनी विवाहपछि थोरै मात्र चलचित्रमा काम गरेकी छिन् । विवाहपछि उनी ‘सिलसिला, कभी खुशी कभी गम, लागा चुनरी में दाग र कल हो न हो’ चलचित्रमा देखिएकी थिइन् । पछिल्लो पटक उनले २०१३ मा बाइलिंगुअल चलचित्र ‘सनग्लास’ मा नसीरुद्दीन शाहसँग काम गरेकी थिइन् । अब सात वर्षपछि उनी मराठी चलचित्रबाट अभिनयमा फर्किदै छिन् ।
