राम्रो अनलाइन
१२ फागुन २०७९, शुक्रबार
काठमाडौँ— राष्ट्रपतिमा कांग्रेसबाट साझा उम्मेदवार बनाउने सहमति गरेका आठ दलले उपराष्ट्रपतिमा जसपाबाट साझा उम्मेदवारी दिने सहमति गरेका छन् । प्रधानमन्त्रीको सरकारी निवास बालुवाटारमा बसेको नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी, लोकतान्त्रिक समाजवादी पार्टी, जनमत पार्टी, नागरिक उन्मुक्ति पार्टी र राष्ट्रिय जनमोर्चाका शीर्ष नेताहरूको बैठकले राष्ट्रपतिमा कांग्रेस र उपराष्ट्रपतिमा जसपाबाट साझा उम्मेदवारी दिने सहमति जुटाएका हुन् ।
तर, अहिले उपराष्ट्रपतिको निर्वाचनको मिति नै नतोकिएको भन्दै नेताहरूले त्यसबारे सार्वजनिकरुपमा बोलेका छैनन् । कांग्रेस उपसभापति पूर्णबहादुर खड्काले अहिले उपराष्ट्रपतिमा जसपाबाट साझा उम्मेदवारी दिने समझदारी बनेको बताए ।
‘अहिले उपराष्ट्रपतिको चुनावको मिति नै तोकिएको छैन । हामीले उम्मेदवार तय गर्नुको पनि कुनै अर्थ रहँदैन,’ उनले भने, ‘त्यसैले त्यो पछिको कुरा हो । तर पनि दलहरूबीचमा उपराष्ट्रपतिमा जसपाबाट उम्मेदवारी दिने समझदारी बनेको छ ।’
